2013-05-30

De sententia a Seneca belle dicta

Apud declamatores saepe legimus legem notissimam et humanissimam,

Liberi parentes alant aut vinciantur.

Quid enim magis debetur pietati quam ut filius, quem parens infantem nutriverit, senilem patrem et anilem matrem ipse alat? Cuius legis ut exemplum afferam, infra thema apponam de Senecae patris Controversiarum septimo sumptum:

7.4. Mater Caeca Filium Retinens

Liberi parentes alant aut vinciantur.

Quidam, cum haberet uxorem et ex ea filium, peregre profectus est. A piratis captus scripsit de redemptione epistulas uxori et filio. Uxor flendo oculos perdidit. Filium euntem ad redemptionem patris alumenta poscit; non remanentem alligari volt.

Hoc in themate, ut patet, opponitur pietas erga patrem debita alteri erga matrem reddendae: quarum parilitas eo augetur, quod a piratis captus est pater, mater oculis. Itaque aequales causae poni possunt, nec solvi potest quaestio quae sub themate iacet. Hoc enim est quasi medulla controversiarum: ut ex utraque parte valida et verisimilis causa dici possit, unde cogatur declamator omnes partes tueri et considerare (id quod omnino contrarium est hodiernis rixis politicis, quibus nemo neminem nisi semet ipsum habeat in mente vel in pretio). Sed fuerunt etiam apud antiquos qui immerita superbia et tumescente amore unius membri non solum totum humanitatis complexum omitterent sed etiam existimarent se nugatoriis theorematibus pro ratione fretos omnem obscuritatem de indeprehensibilbus ethicorum aenigmatis facile excutere posse:

Buteo fatuam quaestionem moverat primam: an lex quae de alendis parentibus lata esset ad patres tantum pertineret; illis omnia privilegia data et ipsam poenam non alentium signum esse non muliebris potestatis. Res est ineptior quam ut coarguenda sit; itaque transeo. Illud unum quod dicebat Pollio Asinius referam: numquam debere temptari in causa verecunda inprobam quaestionem.

Sunt qui hodie pergant talia "signa non muliebris potestatis" in omnibus fateri se videre, sicut etiam videant "signa voluntatis Dei legislatorem legis naturalis" et similia—id est, qui pergant improbas quaestiones movere. Quid in eos diceret Seneca, audire velim: taedet enim improbas quaestiones legere inter epistolas electronicas.

De Securitate Muris

Nuper a diurnariis relatum legimus pyrobolum esse in Muris terra Californiana displosum, iuvenem quendam Muris subditum, proditorem exsecrandum, ab inquisitoribus comprehsum esse qui glaciem carbonii dioxidi in aqua calida immersam et in lagoena inclusam condidisset in receptaculo quisquiliarum ut terrorem incuteret innocentibus Muris amicis. Nec prima vice Californienses contra Murinum Tyrannum agitavere: nam anno praeterito praetoriani ad portas arcessiti erant ad tumultuosos iuvenes arcendos. Infelicissimus vero omnium fuit annus millesimus nonagentesimus septuagesimus, quippe quo praetoriani intra portas in Murinum regnum intravissent ad Viam Principalem recipiendam et seditionem scelestorum Iippiensium pacandam.

custodes

Anno 2012º ante portas praesidium instructum erat ne tumultuosi iuvenes Californienses pacem Muris turbarent.

praetoriani1970

Anno 1970º necesse fuit milites in Muris Terram Californiensium immitti ad Communistas lascivos reprimendos.

At talia modo in California, barbara terra quondam Amazonidum, usque dolentium Calafiam debellatam, fieri possunt: qua longe abest Mundus Murinus Floridianus, qui non iniuste numeratur non solum omnium utriusque orbis terrarum locorum laetissimus sed etiam inter tutissimos. Nam si quis in quendam casum inciderit, ut si subitaneo cordis defectu afflictus sit sive crus fregerit, auxilium ei mittetur non inter horas nec minutas horae partes sed intra unam minutam: immo medium temporis intervallum quo interciderit inter casum telephonice relatum et medicorum adventum dicitur esse ad intra sex et octo minutas horae partes. Nec refert quo in Murini Mundi loco casus acciderit: intra dodrantem unius minutae medicus vigilesve mittentur, nam cum auxilium telephonice advocatum sit, statim sciant tyranni Muris ordinatra ubi sit telephonum vel fixum vel gestabile. Medici porro sic per Mundum disponuntur ut nusquam desit subsidium.

In medica manu afferenda, una quaeque secunda pars temporis maximi habenda est momenti: nam Galli inter primum totius mundi bellum didicerunt "aureum" nuncupare primam horam post cladem acceptam, intra quam multo facilius est vitam servare; nunc vero medici volunt intra octo minutas horae partes respondere, quam plerisque in urbibus Americanis obtinent, quamquam Californienses cives (extra Muris Terram), ut qui nesciant se regere nec rempublicam ad salutem communem ordinare ad quadrantem horae exspectare solent.

Muris medici Floridenses possunt paulo citius respondere propter formam regiminis quae ibi constitutum est. Nam plerumque Florida civitas, terris aboriginum exceptis, in comitatus dividitur, et comitatus in municipia et rus; custodes igitur publici et vigiles et medici munere funguntur urbani pro urbe ac rustici pro comitatu. Murinus autem Mundus his institutis excipitur et magna ex parte sui iuris est, cum pacta sit ut regio extraordinaria ad Muris diligentia committeratur quam ipse regeret ad suam voluntatem. Licet per hoc pactum Muri, si voluerit, etiam reactorium atomicum aedificare. Duo igitur inter Muris fines condita sunt oppida, quae inter alia suos instruxerunt vigiles et medicos: Lacus Sinuosus, cui sunt ad quinquaginta cives, et Lacus Boni Visus, decem civium amplitudine. Cotidie vero ad centum triginta milia peregrini visitant: quod non aliud est quam si omnes Gaditani eodem tempore minimum in pagum omnis Hispaniae descenderint. Cotidie porro sexagies et quater arcessuntur medici, partim sine causa, partim ad vitas servandas.

His duobus oppidulis minimis conditis, licet Muri tyranno per magistratus populari more electos suam voluntatem exercere ad omnia ordinanda, ne quid fiat adversum. Neutrius tamen oppidi senatus, sive Muris theatrum neurospastorum, adhuc censuit biocolytas constituendas, unde licet comitatus Aurantia, qui ante Muris adventum agros dominabat, curare scelestos (paucos qui sunt) comprehendendos.

Nec, quamvis sui iuris sit Muris Mundus, constitutum est ut milites legerit, sed pacto cum Republica icto Mundus defenditur a militibus aeriis qui ad Villam Iacsonis castra posuerant et classe aeroplanorum caelum tuentur. Ab his post nonum diem mensis Septembris anno bismillesimo primo usque ad hodiernum diem atque in perpetuum ne quis ad Mundum per caelum appropinquet interdicitur. Quod religiosioribus quibusdam confutavit: nam nonnulli superstitioso amoris odio moti voluerant pone aeroplanum trahere magnam praeconium quo monerent Muris subditos ne quis amorem probaret eiusdem naturae (nam homophilos, ut vocitantur, oderunt nonnullae sectae Christianae, ut vocitantur); ac coram iudicibus Reipublicae causam egerunt ut interdictio caeli sibi tolleretur. Quod non impetraverunt. Sic etiam bellicis aeronavibus pyraulocineticis defenditur omne genus amoris apud Murem.

2013-05-29

De tristi nuntio nuper accepto

Iuxta matrem, in civitate longe a paludibus remota, habitat familia insolita et temeto nimis dedita. Patricia enim illius familiae mater (divortio a patre seiuncta) ibi versatur, femina morosa et vinolenta, quae recentioribus annis tantam vim temeti coepit haurire ut propter periculum quod sibimet ipsi fecisset nonnumquam necesse esset sorori vicinae vel filiae, quae cum suae matri nonnumquam versabatur, custodes publicos compellare qui illam ad valetudinarium efferrent ubi ad salutem sanitatemque reduceretur.

Latine dicitur de fructu arbor cognosci posse, cui opponi potest adagium aliud et Americanum: haud procul de arbore cadere fructum. Sic filia, Guinevera nomine, non longe a sua matre discrepat, ut eventus docebit, nisi quod non solum vino sed etiam venenis narcoticis dari fertur (ut fama apud vicinos est, sed certum testimonium ipse afferre nequeo nec volo posse). Speciosa quondam fuerat, abhinc annos fortasse quinque vel septem, gracilis, admodum venusta: cui tamen vinum venenumque omnem pulchritudinem una cum gaudio surripuerunt.

Die Memoriali, Guinevera constituit vino madida iter quoddam facere, ebria autoraedam gubernabat, cursum male direxit vel fortasse temeto oppressa non direxit sed raedam sivit suam voluntatem sequi: certum autem est vestigia raedaria indicare eam de semita deflexisse cursum, trans alteram semitam, trans limitem medium, trans curricula opposita quae vehicula ad se ferebant, trans gramineum campum, tandem in aedes cucurrisse.

imago

Ibi decem annos versati erant senex et anus, matrimonio feliciter abhinc plurimos annos coniuncti, qui ante modo horas quasdam in agris cum vicinis amicis fraga carpserant; senex se ad culinam contulerat ad aquam petendam, dein subito et ex inopinato per parietem et fere per totas aedes irruit autoraeda; maritus trusus usque per domum inter mensam et parietem comprimitur, uxor graviter laeditur. Vicini festinantes auxilium afferre inveniunt cruentem uxorem garrientem de mariti salute—de nulla alia re cogitare potest sed maxime sollicitatur de eius corde iam debili—et inveniunt maritum inter ruinas suae domi interclusum et livescentem sed adhuc e quadam parte loquelae capacem. Inveniunt etiam raedam, unde benzinum effundi videtur ut de odore iudicari potest: quare cito vectorem de raeda extrahunt. Illa illaesa atque incolumis coepit titubare per reliquias aedium molestam se praebens, vaga vinolentae voce rogitans anum an valeat. Vicina medica excandescens iubet eam e suo conspectu auferri, cum sene semivivo manet dum adveniat arcera.

Ut longam narrationem et dolorosam breviter absolvam, senex ex omni parte diffractus paucas horas in nosocomio ante degit quam in dolorem, qui medica manu sublevari non potuerat, manus Mortis finem posuit. Uxor vivit, sed laesa atque orbata marito. Guinevera comprehensa in carcere alligata tenetur, quae in ius ducatur mense Iunio. Damnata ad viginti annos in carcere manebit.

Tota narratio, ab initio usque ad finem, videtur sumpta ex monitoriis exemplis quibus abstemii abavi solebant contra vinum praedicare. Haec vero non est fabula cuiusdam contionatoris peccata periculaque bibendi deprecantis, sed facinus est vicinae, quam ipse noveram, et a diurnariis inter acta relatum. Ultimum, quod e diurnariis discere potui, fuit quasi locus communis qui in talibus casibus semper auditur: Patriciam cognatosque dicere se sollicitudine pudoreque commotos dormire non iam posse, preces ergo erga Dominum offundere pro sene occiso et uxore vulnerata. Sed mea mater, quacum per telephonum collocutus sum, unum aliud addidit, quod diurnarios latet: se multum fragorem et strepitum nocturnum audire e vicinis, quippe qui quasi infinitam copiam lagoenarum in receptaculum quisquiliarum nunc immitterent: nam familia, quae dormire nequit, id solacium quod in precibus non inveniret peteret in vino. Non enim cum temporibus semper mutantur homines.

2013-05-27

In Diem Memorialem

imago

Mensis Maii ultimo die Lunae eorum meminimus qui mortui sunt, qui nunc in haerenosis tescis moriuntur, qui olim morituri sunt propter eos, quibus pax non sufficit. Utinam puero in imagine depicto alteram liceat viam et humaniorem sequi, qua ad praemia pacis ducatur.

2013-05-26

De imaginibus coloratis

Nuper in pretium venit ut templa statuasque Graecas Romanasque coloribus ornarentur, nec iniuste, cum ars chemica cum ea archeologica coniuncta id doceret quod e litteris antiquis iam compertum haberemus, nempe hoc: coloribus oblectatos esse homines antiquos. Recentioribus saepe in pretio fuit opinio Aristotelis, qui de arte tabulas pingendi in Poeticis scripsit:

εἰ γάρ τις ἐναλείψειε τοῖς καλλίστοις φαρμάκοις χύδην, οὐκ ἂν ὁμοίως εὐφράνειεν καὶ λευκογραφήσας εἰκόνα. (1450b)

Nam si quis speciosissimis coloribus fuse inunxerit, haud similiter delectet ac si imaginem creta depinxerit.

Itaque per saecula statuae candidae simplici pulchritudine animos ad reverentiam formarum alliciebant. Sed non ita videbant antiqui suas statuas aedesque fucatas et multicolores.

Templum Graecum

Quae quantavis annorum copia a nobis remotae non tamen longe abesse videntur ab ecclesiis Graecis vel etiam delubris Indicis quae adhuc visi possunt:

Delubrum Sancti Photii
Templum Indicum

Cogitandum itaque videtur de notissimis Romanorum imaginibus omni colore carentibus:

Ara Pacis, sine coloribus

Quomodo se praebuerunt oculis antiquorum?

Ara Pacis, cum coloribus

Aliae imagines inveniri possunt apud reed.edu.

Imaginibus coloribus infusis equidem multo magis delector; sed numquam avidus dici potui sectator Aristotelis. Est autem his in imaginibus etiam quasi specimen eius animi erga linguas litterasque quo homines hodie afficiuntur: sunt enim qui verbis tamquam coloribus oblectentur et quibus aliquid vitale sit in litteris; alii vero sunt, quibus magis placeat vividis coloribus abstractis nil nisi atramentum alba in pagina videre, et praecipue si in charta tabulatim disponuntur formae sententiarumque ossa rationis lumine quasi diuturna solis vi exsiccata et dealbata. Est enim in cadaveribus colore vitaque privatis aliquid simplicius, quo contemplator sentiat se omnia ratione intellectuque comprehendere, sed in rebus vividis et versicolorbius, ne dicam in fuco sophistarum, semper latitat aliquid indeprehensibile quod tenebras animis nostris offundere videtur. Fortasse ea de causa placent declamationes, quarum sententiae, divisiones, colores semper nos eludunt.

2013-05-25

De navibus nuper in Europa emptis

A diurnariis relatum est Hispanos novum genus navis subaquaneae parare, quae propter menda quaedam mathematica adeo gravior sit quam esse debeat ut semel demersa ad undas luminisque oras rursus ascendere nequeat, sepulchrum fiat nautis omnibus et irrevocabilis iactura tam classi navali quam aerario. De quibus omnibus non nimis sollicitamur, cum compertum habeamus Hispanos numerorum peritos posse has difficultates tollere atque efficere ut navis Hispana iterum inter undas omnium gentium natet. At aliud est, quod non intelligimus: cur velint Hispani naves subaquaneas?

Haud soli esse videntur hac in cupidine navium longarum, teretium, Freudianarum. Legimus enim Graecos inter procellas pecuniarias anno bismillesimo decimo emisse sex naves submarinas, et Italos vectigaliis fatigatos duas cum Germanis parare. Immo multae gentes hodie videntur tales naves cupere:

Respublica Naves Emptae Sumptus Publicus
Aegyptus 2 "Tridentes" Germanicae $1,000,000,000
Graecia 3 "Tridentes" Germanicae $2,324,000,000
aliae renovatae et novae $1,678,000,000
Hispania 4 "S-80" Hispanicae
(quae navigare non possunt)
$2,856,000,000
Italia 2 "Delphini" Germanici ?
Israel 6 "Delphini" Germanici $3,000,000,000
Lusitania 2 "Delphini" Germanici ?
Turkia 6 "Delphini" Germanici $2,582,000,000

Sed ad quem finem? Quae utilitas est his navibus subaquaneis? Quid maioris utilitatis inest his in instrumentis belli, quae ad nullum pacificum usum verti possunt, quam in pauperibus sublevandis, in humana scientia augenda et divulganda, in vitam communem promovendam? Quid gentibus pacificis cum armis inter pacem Europaeam? Cuius naves ex inopinato deprimere volunt, si nullum est bellum, nemo hostis? Cur nunc temporis?

Cur tantos sumptus impendunt in naves, quibus nulla est utilitas neque etiam (apud Hispanos saltem) facultas navigandi, cum pecunia eodem tempore demitur a rebus communibus et bono publico?

2013-05-24

De arce thalamoque Barbae Caeruleae

Plerisque nostratibus ignota est fabula de crudeli Europaeorum regulo caerulea barba insigni, sed notior est pirata eiusdem appellationis "Bluebeard" sive "Barba Caerulea." Quod non longe discrepat a nomine notissimi latronis maritimi "Blackbeard" sive "Barba Nigra," ut vocitabatur Eduardus Teach, qui maria late vastabat antequam litus Hantoniae ornatum est eius capite in contum a Virginiensibus latrones tyrannosque aegre ferentibus infixo. Et saepe audimus homines nomina similia confundere, sed certissimis indiciis archaeologicis compertum habemus duos fuisse piratas, nam in Caribbici maris insula Sancti Thomae sunt castella utriusque piratae, quorum notior est arx Barbae Caeruleae, quondam munimentum triste, nunc laetum et amoenum deversorium peregrinantium:

NewImage

Deversorium per annos magnopere auctum est, et aedes nuperrime renovatae sunt; sed arx ipsa, quae medulla est huius fortissime muniti receptaculi voluptatis ut quondam erat latebra et tutum fortilitium piratae Barbae Caeruleae, pro thalamo nunc adhibetur, ubi viri uxoresque novissime in nuptiarum fidem coniuncti etiam matrimonii gaudio prima vice fruantur.

2013-05-22

De Principissis Armandis

Quod etiam tempore matutino die quinto decimo late negatum erat, eodem die confirmatum est: Merida principissa novissima rursus armatur.

Merida

Nam Muris ministri nuper coeperant novo more principissas delineare, et Merida novissima in principissarum numerum rite inducenda erat: unde factum est ut haec Merida e forma computatrali in novissimum pingendi morem sit traducta. Sed nonnihil immutatum est: gracilior enim nova Merida videtur, pectore paululo pleniori (forte si diu intueris), auro ornata; sed duae res praecipue animadvertendae sunt, quae causae factae sunt parentium irae: primum, fucata esse videtur; deinde, armis privatur, pro quibus zona ornatur.

Parentes excanduerunt; inciderunt Disneienses in cladem inter maximas numerandam. Feministae querebantur quod Merida deberet puellis monstrare eas posse mundum temporaque mutare potius quam tropaea fieri admiranda: sed mundus non cingulis sed armis mutatur. Fuisse Meridam fortem, sibi confidentem, se servaturam principissam…prompto arcu, at hanc novam zonam atque incestum fucum significare feminas ut aestimarentur, oportere ad angustam quandam pulchritudinis finitionem conformari. Etiam illa pellicularum artifex quae Meridam prima invenerat censuit negligentiam huius novitatis abominandam, puellas talibus figuris induci posse ut mergerentur in meretricium illud 'veni huc' aspectum et gracilitatem, mallent nil fieri quam facies pulchra amorem exspectans; novam Meridae speciem videri vapidam, escam quae bracchia virorum alliciat, irrealem, vacuam.

NewImage

Itaque Disneienses coacti sunt novam Meridam reprimere, priscam formam in usum referre. Unde factum est ut in pagina interretali Principissarum, Merida non videtur forma et genere delineandi esse cum aliis Principissis consentanea—sed certo certius depingitur armata.

Armata enim apud Lacedaemonios Venus, apud nos principissae (videlicet ut se aliosque liberent a tyrannis et omnes homines reddant liberos).

Animadvertimus Jezebelenses nunc etiam queri de aliis principissis: eas fucatas esse, labris nimis inflatis, pectoribus nimis magnis, videri incestas. Subdimus igitur imaginem, ut lectorum iudicia eliciamus: utrum nova forma huius quoque principissae adeo incesta, imbellis, inermis est ut puellas corrumpere et in pigritiam ignaviamque inducere possit, an potius tuta atque apta puellis vobis videtur?

NewImage

(Quae electronice reclamant (fortasse sunt Europaeae, nam displicent Americanis petitiones electronicae) praetoriam habent apud amightygirl.com.)

2013-05-18

De Certamine Eurovisifico anno 2013º habito

Relatum hodie est novam reginam Europaeorum electam esse Aemiliam Silviam Danam, philosopham totius orbis veteris elegantissimam. Nam ex antiquissimis temporibus certabantur philosophi Graeci atque inter athletas orationes habebant in Olympiis et aliis omnium gentium conventibus: cecinit Solo, cecinerunt sapientes, praeerat poetarum arti Apollo deus sapientiae. Eius patrimonii culmen et summum est, procul dubio, hodiernum certamen Eurovisificum, ubi philosophi hodierni congressi cantant quo melius mundum nos omnes intelligamus.

Adeo constans erat Aemiliae Silviae doctrina sapientiae, cui titulus "Non nisi lacrimae," querella pacis, ut unumquodque tempus quo illa cantabat eius carmen videretur esse prorsus idem, eius gestus et mos sine variatione fidelissimi. Miram constantiam! Si eam mense Februario videras, omnia quae hac nocte agebatur iam vidisti.

Sane barbaris terris longissime remotis, trans mare Oceanum (quod navigari non potest) sitis, philosophia adeo deest ut non liceat incolis audere his conventibus interesse, sed aliquando ingenio pauperrimi nos interrogamus quid fieret, si nostras quidam ad Eurovisionem mitteretur. Nam certamina elegantiae et philosophae (idgenus saltem quod inter barbaros valet) apud nos habentur, inter quae nuperrime electa est Candida Glover, quam supicamur competitricem nostram Eurovisificam hoc anno futuram fuisse:

Hac in carmine tractatur quaestio ethica et epistemologica haec: quomodo debeat homo se gerere erga alterum, si nesciat an ille sit fidelis. Trita sane disputatio epistemologica (dividitur, ut apud antiquos, in partes duas: utrum alter fideliter amet an mobilis ludat) et trita hortatio ad fidem, sed consulitur etiam de quaestione ethica: quomodo debeat homo se gerere erga talem. Ponit philosopha se alteri valedicturam si fidem non praestiterit, perfidos lusores non esse ferendos.

At animadvertendae sunt pauperitas et rusticitas, vitia novi orbis: nam non cymbalum sive discum aurichalceum vides sed testam vasis quisquiliarum, nec tympana sed caudices ligneos vel alias res magis cotidianas quam Musis dignas. Neque adsunt pumiliones, gigantes, eunuchi, alia portenta hominum, quae si adessent auditores moverent ut cantatoris sapientiam admirentur; nec funambulus nec praestigiator nec magus nec veneficus nec saltatores seminudi nec Sapphicae puellae basia inter se tradentes; immo adeo inculta sunt haec nostra "certamina" ut etiam Britanni, si eorum referret certare, facile possent incultos nostrates et nimis solitos insolita et Europaea elegantia superare. Nec, si magnam vim micantium schedularum de laqueario inter "Non nisi lacrimae" carmen demissam videris, magni facies parvulam copiam iudicis manu secundum rusticum quendam ritum sparsam in fine huius carminis:

Multa adhuc sunt nobis discenda. Quomodo enim umquam poterimus certare cum hoc philosopho et quasi archimago Dacoromano?

Volumus etiam curiositatis causa mentionem facere de Erico Saade Sueto qui λόγον τινα protulit profundum et interpretatione dignum: nam Petrae Medae certamini praefectae dixit: "Rursus ad te, Petra #milf."

"Milf" enim apud nos raro aut numquam dicitur, sed apud Suetos ut apparet maiore in pretio habetur. Fertur (quod sciam) sibi velle "aetate provectiorem sed formosam."

2013-05-10

Annotatio aeronautica

Apud Leonem Allatium haec reperiuntur:

Antiqui enim, ex Dionysio Areopagita de Ecclesiast. Hierarch. cap. iv, unguentum Christum nuncupabant,

πηγαῖον ὄντα τοῦ θείων εὐώδων ἀντιλήψεων ὄλβον, ἀναλογίαις θεαρχικαῖς εἰς τὰ θεοειδέστατα τῶν νοερῶν ἀναδιδόντα τοὺς θειοτάτους ἀτμοὺς, ἐφ᾿ οἷς οἱ νόες εὐπαθῶς ἡδόμενοι καὶ τῶν ἱερῶν ἀντιλήψεων ἀποπληρούμενοι, τροφῇ νοητῇ χρῶνται τῇ πρὸς τὸ νοερὸν αὐτῶν εἰσδύσει τῶν κατὰ θείαν μέθεξιν εὐώδων διαδόσεων.

Fontem copiosum, ex quo suavitates divinorum odorum recipiantur, divinisque proportionibus in mentes, quae divinitatis speciem maxime prae se ferunt, divinissimus suffitus infundatur, ex quibus mentes, suavitate quadam motae, sacrisque suavitatis divinissimorum suffituum perceptionibus refertae, spiritali cibo utuntur, ingresso distributionum odorum bene olentium, secundum divinam participationem ad id, quod in eis vim intelligendi habet.

Datum ex auris caelestibus, inter Regnum et Provinciam.